Ministrja Koçiu prezanton drejtorin e ri të Agjencisë së Mbikëqyrjes Policore: Hallkë kyçe në garantimin e integritetit të strukturave ligj-zbatuese

Ministrja e Brendshme, Albana Koçiu, prezantoi të martën zyrtarisht Drejtorin e ri të Agjencisë së Mbikëqyrjes Policore (AMP), Eduart Merkaj.

Gjatë ceremonisë, ministrja Koçiu theksoi rolin jetik të agjencisë për integritetin e strukturave ligj-zbatuese.

“Agjencia e Mbikëqyrjes Policore mbetet një hallkë kyçe në garantimin e integritetit, etikës dhe profesionalizmit të punonjësve të institucioneve që ajo mbikëqyr,” deklaroi ministrja.

Ajo kërkoi që çdo shqetësim apo ankesë e qytetarëve të trajtohet me prioritet dhe me përgjegjësi të plotë, duke siguruar se publiku do të ketë një njësi mbikëqyrëse të paanshme dhe profesionale.

“Ky është angazhimi ynë i pandryshueshëm,” nënvizoi Koçiu.

Eduart Merkaj vjen në drejtimin e AMP me një eksperiencë të gjerë në struktura të ndryshme ligj-zbatuese dhe të sigurisë kombëtare. Para këtij emërimi, ai ka shërbyer si drejtor i Departamentit të Kufirit dhe Migracionit në Policinë e Shtetit.

Merkaj ka mbajtur poste të rëndësishme edhe në:

Policinë Kriminale

Shërbimin për Çështjet e Brendshme dhe Ankesat (SHÇBA)

Shërbimin Informativ Shtetëror (SHISH)

Struktura të specializuara të hetimit të korrupsionit.

Emërimi i Merkajt vjen në një kohë kur rritja e integritetit dhe lufta kundër korrupsionit brenda radhëve të Policisë mbeten prioritete kryesore për Ministrinë e Brendshme.

/rtsh.al/