NJU JORK – OKB voton rezolutën që kërkon armëpushim në Gaza, lirimin e pengjeve dhe aksesin humanitar
NJU JORK, 12 qershor /ATSH/ – Asambleja e Përgjithshme e Kombeve të Bashkuara pritet të votojë sot një rezolutë që bën thirrje për një armëpushim të menjëhershëm në Gaza, lirimin e të gjithë pengjeve të mbajtura nga Hamasi dhe hapjen e të gjitha kalimeve kufitare izraelite për shpërndarjen e ushqimit dhe ndihmave të tjera të nevojshme, sipas AP.
Rezoluta, e hartuar nga Spanja “dënon fuqimisht çdo përdorim të urisë kundër civilëve si metodë lufte”.
Ekspertët dhe aktivistët e të drejtave të njeriut thonë se uria është e përhapur në Gaza dhe rreth dy milionë palestinezë përballen me urinë nëse Izraeli nuk e heq plotësisht bllokadën dhe nuk e ndal fushatën e tij ushtarake, të cilën e rinovoi në mars pas përfundimit të një armëpushimi me Hamasin.
Javën e kaluar, Këshilli i Sigurimit i Kombeve të Bashkuara dështoi të miratonte një rezolutë që bënte thirrje për një armëpushim në Gaza dhe i bënte thirrje Izraelit të hiqte të gjitha kufizimet në shpërndarjen e ndihmave.
Shtetet e Bashkuara i vunë veton rezolutës sepse nuk lidhej me lirimin e pengjeve, ndërsa të gjithë 14 anëtarët e tjerë të këshillit votuan pro.
Nuk ka veto në Asamblenë e Përgjithshme me 193 anëtarë, ku rezoluta pritet të miratohet me shumicë të madhe.
Megjithatë, ndryshe nga Këshilli i Sigurimit, rezolutat e Asamblesë nuk janë ligjërisht të detyrueshme, megjithëse ato konsiderohen si një barometër i opinionit publik global.
Pas një bllokade 10-javore që pengoi çdo ndihmë për Gazën, Izraeli po lejon Kombet e Bashkuara të sigurojnë një rrjedhë të vogël ndihme ushqimore dhe po mbështet një grup ndihme të sapoformuar amerikan, i cili ka hapur disa zyra në qendër dhe në jug të territorit për të shpërndarë pako ushqimore./ /os/