Peleshi pret Tarran: OSBE, partnere e çmuar për avancimin e reformave
TIRANË, 26 shtator /ATSH/ Kryetari i Kuvendit Niko Peleshi priti sot në Kuvend ambasadorin Michael Tarran, kryetar i Prezencës së OSBE-së në Shqipëri.
Përmes një postimi në rrjetet sociale Peleshi thekson se takimi u zhvilluar “për hapat e përbashkët drejt forcimit të demokracisë, modernizimit të punës së Kuvendit dhe rritjes së transparencës në shërbim të qytetarëve”.
“Mbështetja e OSBE-së mbetet një partneritet i çmuar për avancimin e reformave dhe forcimin e institucioneve tona demokratike”, shkruan Peleshi.
Nga ana tjetër, ambasadori Tarran rikonfirmoi angazhimin e Prezencës për të mbështetur institucionet demokratike të Shqipërisë, dialogun politik gjithëpërfshirës dhe reformat e proceset parlamentare pjesëmarrëse.
“Kuvendi ka një rol qendror në zbatimin e ndryshimeve transformuese që thellojnë dhe forcojnë qëndrueshmërinë e demokracisë, proceseve demokratike dhe kuadrit kombëtar të llogaridhënies në Shqipëri”, theksoi Tarran.
Sipas Tarran diskutimi vuri në dukje vizionin e Kryetarit për një Kuvend të modernizuar, transparent e gjithëpërfshirës.
“Temat kryesore përfshinë transformimin dixhital dhe përparimin e legjislacionit elektronik, përfshirjen e qytetarëve dhe të të rinjve, si edhe mbështetjen e OSBE-së për reformat zgjedhore dhe territoriale, proceset legjislative dhe mbikëqyrëse, dhe forcimin e kapaciteteve institucionale”, theksoi Tarran.
Kuvendi i ri pritet të përfshihet në realizimin e reformës zgjedhore për zbatimin e rekomandimeve të OSBE/ODIHR-it.
Kështu, pritet ngritja e komisionit të posaçëm për reformën zgjedhore, i cili duhet të adresojë rekomandimet e OSBE-ODIHR-it ku përparësi janë depolitizimi i administratës zgjedhore dhe nevoja e nxjerrjes së shpejtë të rezultatit.
Më herët gjatë javës, kryetari i Kuvendit Niko Peleshi, ka pritur edhe të tjerë përfaqësues të institucioneve ndërkombëtare në vendin tonë, si të ngarkuarën me Punë të Shteteve të Bashkuara, Nancy VanHorn, ambasadorin e Bashkimit Evropain Silvio Gonzaton si dhe ambasadorin e Mbretërisë së Bashkuar, Nicholas Abbott.
/m.q/j.p/