Rama: Shqipëria e para në Ballkanin Perëndimor për transparencën buxhetore

Kryeministri Edi Rama ka bërë të ditur se Shqipëria është renditur e para në Ballkanin Perëndimor për transparencën buxhetore, sipas rezultateve të Anketës së Buxhetit të Hapur 2025.

Në podcastin e tij “Flasim”, Rama e cilësoi këtë si një vlerësim ndërkombëtar domethënës, duke theksuar se anketa e realizuar nga International Budget Partnership e pozicionon Shqipërinë në krye të rajonit për nivelin e transparencës në menaxhimin e financave publike.

Sipas kryeministrit, treguesi i transparencës buxhetore në Shqipëri është rritur nga 38 pikë në vitin 2015 në 64 pikë në vitin 2025, duke shënuar pothuajse dyfishim brenda një dekade. Ai nënvizoi se vendi ka realizuar progresin më të madh historik në këtë tregues krahasuar me shtetet e tjera të rajonit.

Rama theksoi se ky rezultat nuk është i rastësishëm, por pasojë e reformave të ndërmarra gjatë dhjetë viteve të fundit, përfshirë digjitalizimin, përmirësimin e standardeve të raportimit dhe forcimin e mekanizmave të llogaridhënies.

“Dhe pika e fundit për sot, shënimi i fundit, është një tjetër vlerësim për Shqipërinë si vendi lider në Ballkanin Perëndimor. Për çfarë? Për transparencën buxhetore.

Një vlerësim ndërkombëtar domethënës: Anketa e Buxhetit të Hapur 2025, e realizuar nga partneriteti ndërkombëtar për buxhetin, që e rendit Shqipërinë të parën në Ballkanin Perëndimor për transparencën buxhetore.

Një rezultat i rëndësishëm që mat një nga elementët themelorë të mirëqeverisjes: sa i hapur është shteti ndaj qytetarëve në mënyrën se si mbledh, administron dhe shpenzon fondet publike.

Nga 38 pikë në vitin 2015, Shqipëria është 64 pikë në vitin 2025, pra thuajse dyfishin. Shqipëria ka shënuar progresin më të madh historik në këtë tregues, krahasuar me vendet e tjera. Ka më shumë rëndësi fakti, madje, se nuk bëhet fjalë për një përmirësim të rastësishëm, por për një rezultat të një dekade reformash, digjitalizimi, rritje standardesh të raportimit dhe forcimit të mekanizmave llogaridhënës. Dhe, në një kohë kur vendi po afrohet në Bashkimin Europian dhe po tërheq investime gjithnjë më të mëdha ndërkombëtare, transparenca nuk është vetëm një standard demokratik, ai është një kusht i rëndësishëm dhe i domosdoshëm për besimin. Natyrisht, kemi nevojë të bëjmë më shumë në këtë drejtim dhe kemi nevojë të rritemi më shumë. Dhe këtë e bëjmë duke vazhduar punën dhe duke synuar, jo më vendin e parë në rajon, por nivelin mbi mesatar të shteteve anëtare të Bashkimit Europian”, theksoi Rama.

/rtsh.al/