TIBET – Dalai Lama: Pas vdekjes sime do të emërohet një pasardhës

INDI, 2 korrik /ATSH/-Udhëheqësi shpirtëror tibetian, Dalai Lama tha sot se institucioni shekullor budist tibetian do të vazhdojë pas vdekjes së tij, duke i dhënë fund viteve të spekulimeve se ai mund të ishte personi i fundit që do të mbante këtë rol, sipas AP.

Duke folur në festimet përpara ditëlindjes së tij të 90-të, kreu shpirtëror i Budizmit Tibetian, fitues i Çmimit Nobel për Paqen, tha se Dalai Lama i ardhshëm duhet të gjendet dhe të njihet sipas traditave të kaluara budiste, ndërsa sinjalizoi se Kina duhet të qëndrojë larg procesit të identifikimit të pasardhësit të tij.

Plani i trashëgimisë së Dalai Lamës është politikisht i rëndësishëm për shumicën e tibetianëve – që kundërshtojnë kontrollin e ngushtë të Kinës mbi Tibetin dhe kanë luftuar për të mbajtur gjallë identitetin e tyre, në atdheun e tyre ose në mërgim.

Është gjithashtu i thellë për budistët tibetianë që e adhurojnë atë si një manifestim të gjallë të Chenrezig, perëndisë budiste të dhembshurisë.

Megjithatë, vendimi pritet të bezdisë Kinën, e cila ka thënë vazhdimisht se vetëm ajo ka autoritetin për të miratuar udhëheqësin e ardhshëm fetar.

Kina ka këmbëngulur se figura e rimishëruar duhet të gjendet në zonat tibetiane të Kinës, duke u dhënë autoriteteve komuniste pushtet mbi atë se kush zgjidhet.

Shumë vëzhgues besojnë se përfundimisht do të ketë Dalai Lama rivalë – një të emëruar nga Pekini dhe një nga murgjit e lartë besnikë ndaj Dalai Lamës aktual. //a.i/