VJENË – IAEA heton sulmet me dronë pranë centralit bërthamor të Zaporizhias

VJENË, 2 korrik  /ATSH-DPA/ – Agjencia Ndërkombëtare për Energjinë Atomike (IAEA) po heton njoftimet për një sulm të dyshuar me dronë pranë centralit bërthamor të Zaporizhias në Ukrainë, i cili ndodhet nën kontrollin e forcave ruse.

Sipas operatorëve të centralit, gjashtë dronë kanë qenë të përfshirë në një sulm të njoftuar të premten, duke dëmtuar disa automjete pranë zonës së ftohjes të centralit.

“Incidenti ndodhi jashtë perimetrit të vendit, rreth 600 metra larg reaktorit më të afërt”, tha IAEA në një deklaratë.

Zaporizhia është objekti më i madh bërthamor në Evropë. Gjashtë reaktorët janë mbyllur për një kohë – pas pushtimit të plotë të Ukrainës nga Rusia më shumë se tre vjet më parë.

“Nëse ky raport konfirmohet, do të përfaqësonte një sulm krejtësisht të papranueshëm në afërsi të një centrali të madh bërthamor”, tha drejtori i Përgjithshëm i IAEA-s, Rafael Grossi.

“Kushdo që qëndron pas sulmeve të tilla po luan me zjarrin. Kjo duhet të ndalet menjëherë”, tha Grossi.

Shefi i IAEA-s paralajmëroi se një numër dronësh po fluturojnë në mënyrë të rrezikshme pranë centraleve bërthamore të Ukrainës, duke rrezikuar sigurinë bërthamore.

IAEA ka luajtur një rol qendror në mbrojtjen dhe monitorimin e gjendjes dhe sigurisë së centraleve bërthamore të Ukrainës që nga fillimi i luftës së Rusisë në Ukrainë në shkurt të vitit 2022.

Agjencia angazhon rregullisht ekipe ekspertësh në vendet aktive të reaktorëve në Rivne dhe Khmelnitski dhe ka mbajtur një prani të përhershme në centralin bërthamor të Zaporizhias që nga shtatori i vitit 2022.

Forcat ruse morën kontrollin e centralit nga Ukraina në mars 2022. /Ad.Ab./ /a.i/