Zelensky: Më 3 janar mbahet takimi i Koalicionit Vullnetmirë për t’i dhënë fund luftës në Ukrainë
Presidenti ukrainas Volodymyr Zelensky ka njoftuar se është arritur marrëveshja për t’u takuar këshilltarët e sigurisë kombëtare të vendeve të Koalicionit të Vullnetshëm (Coalition of the Willing) më 3 janar në Kiev.
“Rustem Umerov sapo më raportoi për marrëveshjen me këshilltarët e sigurisë kombëtare të vendeve të Koalicionit të Vullnetshëm për të mbajtur një takim në të ardhmen e afërt. Po planifikojmë për 3 janar në Ukrainë. Menjëherë pas kësaj, do të flasim në nivel udhëheqësish – takimet janë të nevojshme. Po planifikojmë për 6 janar në Francë,” tha Zelensky.
Gjithashtu, Zelensky shprehu mirënjohjen ndaj ekipit të presidentit amerikan Donald Trump për gatishmërinë për të marrë pjesë në të gjitha format efektive.
“Sot, ekipet tona komunikuan dhe diskutuan me Rustemin hapat e ardhshëm dhe prioritetet në negociata,” tha presidenti ukrainas.
Ky zhvillim vjen pas takimit të Zelenskyt me Trumpin më 28-29 dhjetor në rezidencën Mar-a-Lago në Florida, ku u raportua për përparim të konsiderueshëm në negociatat për t’i dhënë fund luftës në Ukrainë.
Koalicioni i Vullnetshëm përfshin vende kryesisht evropiane (të udhëhequra nga Franca, Britania e Madhe dhe Gjermania), si dhe aleatë të tjerë si Kanadaja, Australia dhe Japonia, me fokus në mbështetje ushtarake dhe garanci sigurie pas një marrëveshjeje të mundshme paqeje.
/rtsh.al/