“Newsweek” do të publikohet vetëm online

Revista amerikane e lajmeve “Newsweek”, e cila u themelua në SHBA para 80 vjetëve, planifikon që ta përmbyllë etapën e shtypit, duke e zhvendosur publikimin e saj vetëm në formatin online, në internet, që nga fillimi i vitit të ardhshëm.

Edicioni i fundit i shtypur i “Newsweek” do të dalë në shitje më 31 dhjetor të këtij viti.

Lajmi u bë i ditur sot nga Tina Brown, kryeredaktore dhe themeluese e “The Newsweek Daily Beast Co.”.

“Newsweek” u bashkua para dy vjetëve me grupin e lajmeve “Daily Beast”.

Brown tha se do të ketë edhe shkurtim të stafit, por nuk dha hollësi specifike se sa njerëz mund t’i humbin vendet e tyre të punës.

Ajo tha se publikimi online do të thirret “Newsweek Global” dhe do të jetë një edicion mbarëbotëror, që kërkon shërbim me parapagesë.