1500 mbështetës në "Ferenc Pushkash"

Afro 1500 mbështetës shqiptarë, të cilët kanë udhëtuar nga të gjitha vendet e Evropës (shoqërimi i tyre është bërë nën masa të rrepta sigurie) ishin të pranishëm në stadiumin "Ferenc Pushkash". Pavarësisht problemeve të krijuara në ambasadën hungareze në Tiranë, ku një numër i madh tifozësh nuk u pajisën me viza, apo edhe çmimeve më të larta të biletave për shqiptarët, përfaqësueses kuqezi nuk i mungoi mbështetja. Atmosfera festive ishte e dukshme dhe përveç brohoritjeve pa pushim, ata binin lehtësisht në sy edhe për dekorin e përgatitur. Prania e tyre është përshëndetur edhe nga presidenti i FSHF-së, Armand Duka. Për "SuperSport" ai tha: "Ne që jemi këtu e kuptojmë sa emocionuese është mbështetja që tifozët i bëjnë skuadrës. Edhe pse janë dukshëm më të pakët në numër se hungarezët, ata kanë bërë që diferenca të mos ndihet. Madje, janë më të ‘zhurmshmit‘ në këtë stadium gjigant".