17 të vrarë pas sulmeve kundër kishave në Keni
Së paku 17 persona janë vrarë nga sulmet me granata në dy kisha në pjesën verilindore të Kenisë, afër kufirit me Somalinë.
Komandanti i policisë, Filip Ndolo, tha se personat e armatosur kishin hedhur granata gjatë sulmit dhe kishin shtënë, derisa besimtarët brenda në kishë kishin filluar të iknin.
Sulmi ndodhi në qytetin Garisa, që është bazë e rëndësishme ushtarake, prej nga forcat tokësore ishin vendosur në Somali, për t’i luftuar militantët e grupit al-Shabab, të ndërlidhur me Al-Qaidën.
Kenia është goditur nga një varg i shpërthimeve dhe sulmeve me granata, prej se në muajin tetor i kishte dërguar trupat e saj jashtë kufirit.