49 kg kokainë nga Ekuadori në Shqipëri, SPAK kërkon pushimin e çështjes për Selim Çekajn, babai i Arbër Çekajt

Dy vite nga arrestimi, Prokuroria e Posaçme kërkon pushimin e hetimit për Selim Çekajn, i akuzuar për trafikimin e 49 kg kokaine nga Ekuadori në Shqipëri.

Çekaj është babai i Arbër Çekajt, i dënuar me 14 vite burg pasi 3 vite më parë u kap me 613 kokainë në magazinat e kompanisë së tij të bananeve ‘Arbri Garden’ në Maminas .

Në të njëjtën skemë u kap para dy vitesh edhe Selim Çekaj, ku në kontejnerin ku ai priste bananet e porositura me firmën e tij EcoalMax nga Ekuadori policia zbuloi të fshehur 49 kg kokainë.

Kontejneri i Selim Çekajt ishte nën vëzhgim prej 1 muaji dhe  kokaina ishte e ndarë në 31 pako e vendosur në shtyllat anësore të kontejnerit me banane, ndryshe nga sasia prej 613 kg kokainë që u kap i biri i 72-vjeçarit, Arbër Çekaj, ku lëndën narkotike e kishte fshehur në dyshemenë e kontejnerit.

Ndërkohë pas arrestimit në prill 2021 Selim Cekaj qëndroi disa muaj në burg dhe më pas masa ndaj tij u lehtësua në arrest shtëpie.

/rtsh/