6 maj 2010 - Rezolutë për vlerësimin e veprimtarisë së Bankës së Shqipërisë për vitin 2009
R E Z O L U T Ë
PËR VLERËSIMIN E VEPRIMTARISË SË BANKËS SË SHQIPËRISË PËR VITIN 2009
Kuvendi i Shqipërisë:
- Duke njohur e vlerësuar rolin kushtetues të Bankës së Shqipërisë për formulimin dhe zbatimin e politikës monetare dhe mbajtjen e administrimin e rezervave valutore të Republikës së Shqipërisë;
- Duke vlerësuar ndikimin e politikës monetare në stabilitetin ekonomik e financiar të vendit;
- Duke marrë në konsideratë zhvillimet ekonomike e financiare botërore dhe ndikimin e tyre në vendin tonë;
- Duke mbështetur e zhvilluar bashkëpunimin me këtë institucion, si dhe duke nxitur bashkëpunimin e tij me institucionet kombëtare e ndërkombëtare;
Konstaton se gjatë vitit 2009 Banka e Shqipërisë:
- Me politikën monetare të ndjekur, ka kontribuar në forcimin e stabilitetit makroekonomik e financiar dhe në qëndrueshmërinë e ritmeve të zhvillimit ekonomik e social të vendit, në kushtet e një krize të thellë të ekonomisë globale;
- Ka realizuar objektivin e saj kryesor, ruajtjen e stabilitetit të çmimeve, duke mbajtur inflacionin brenda kufijve vjetorë të parashikuar;
- Ka plotësuar detyrimet e programit monetar, që rrjedhin nga Marrëveshja e Stabilizim-Asociimit dhe anëtarësimi i pritshëm në BE;
- Ka marrë masat e nevojshme ligjore dhe organizative për të minimizuar efektet e krizës ekonomike e financiare botërore në sistemin tonë bankar dhe për të garantuar depozitat e qytetarëve;
- Ka ruajtur qëndrueshmërinë e monedhës shqiptare kundrejt monedhave të huaja, duke zbatuar një kurs këmbimi fleksibël, në varësi të kërkesës dhe ofertës në treg;
- Ka forcuar rolin mbikëqyrës ndaj sistemit bankar, si dhe ka ndikuar në zgjerimin dhe përmirësimin e cilësisë e të gamës së shërbimeve që ai ofron;
- Ka ndikuar në rritjen e kreditimit të ekonomisë, veçanërisht në sektorin prodhues privat;
- Ka ndikuar në plotësimin e nevojave të tregjeve monetare me likuiditetin e nevojshëm dhe në rritjen e fleksibilitetit të bankave për administrimin e likuiditeteve afatshkurtra;
- Ka zbatuar një sistem të sigurt dhe efiçent pagesash, që reflektohet në rritjen e vlerës totale të likuiditeteve të shlyera dhe zgjerimin e instrumenteve të pagesave;
- Ka ndihmuar në përmirësimin e strukturës së portofolit të huamarrjes së brendshme publike, duke i dhënë përparësi zgjerimit të huamarrjes afatgjatë;
- Ka plotësuar e përmirësuar kuadrin ligjor e nënligjor në fushën bankare, mbështetur në direktivat e Këshillit të Europës, parimet e rishikuara të Komitetit të Bazelit dhe praktikat e përparuara ndërkombëtare;
- Ka rritur transparencën ndaj publikut për politikat monetare aktuale dhe tendencat e tyre të ardhshme;
- Ka mbështetur procesin integrues të vendit në BE;
- Ka rritur cilësinë, ka përmirësuar metodologjinë dhe ka zgjeruar gamën e statistikave monetare e të statistikave të sektorit të jashtëm të publikuara.
Kuvendi rekomandon që, për vitin 2010, Banka e Shqipërisë të konsolidojë më tej punën për:
- Rritjen e efektivitetit të politikës monetare dhe të pavarësisë së institucionit, me synim ruajtjen e stabilitetit të çmimeve brenda objektivit 3 +/-1 për qind;
- Forcimin e mëtejshëm të mbikëqyrjes së sistemit bankar, për të siguruar forcimin e kapaciteteve të administrimit të rreziqeve, rritjen e transparencës së bankave të nivelit të dytë, zgjerimin e gamës së shërbimeve ndaj klientëve dhe reduktimin e kostos së shërbimit;
- Harmonizimin e politikave monetare me ato fiskale, bazuar në modele makroekonomike të qëndrueshme dhe efektive;
- Realizimin e objektivave të tjerë monetarë, në përputhje me strategjinë afatmesme të zhvillimit të vendit, Marrëveshjen e Stabilizim-Asociimit dhe detyrimet për integrimin e vendit në BE;
- Zbatimin e politikave makroekonomike të kujdesshme, për të siguruar qëndrueshmëri afatgjatë të bilancit të pagesave;
- Reduktimin e stokut të parasë jashtë sistemit bankar;
- Nxitjen e kreditimit të ekonomisë, për të rritur investimet në sektorët prodhues, si dhe marrjen e masave monitoruese për të shmangur risqet e mundshme;
- Nxitjen e kreditimit dhe të depozitave në monedhën vendase, me qëllim mbrojtjen e interesave të klientëve dhe mbajtjen nën kontroll të kursit të këmbimit;
- Harmonizimin e legjislacionit bankar me atë të BE-së;
- Përmirësimin e mëtejshëm cilësor e metodologjik të punës studimore e kërkimore.
Kuvendi përcakton si objektiva të tij, në raport me Bankën e Shqipërisë:
- Forcimin e mëtejshëm të rolit monitorues, për të siguruar pavarësinë e Bankës së Shqipërisë dhe repektimin prej saj të detyrimeve ligjore, për forcimin e stabilitetit makroekonomik të vendit dhe rritjen e qëndrueshme të ekonomisë shqiptare;
- Përmirësimin e mëtejshëm të legjislacionit bankar dhe përafrimin e tij me atë të BE-së.
6 maj 2010