AAK: Raporti i Progresit, alarm për gjendjen shqetësuese në Kosovë

Aleanca për Ardhmërinë e Kosovës (AAK) vlerëson se Raporti i Progresit i Komisionit Evropian për Kosovën, nuk është befasues dhe vë në sipërfaqe problemet e shumta me të cilat përballet Kosova.

Raporti i Progresit 2011 tregon edhe njëherë sa shqetësuese është situata në Kosovë, sidomos në aspektin e qeverisjes, manipulimit të zgjedhjeve, sundimit të ligjit, luftës kundër krimit të organizuar, korrupsionit dhe trafikut të drogës, ndërhyrjeve politike në Policinë e Kosovës, aspektin ekonomik dhe lirinë e mediave, thuhet në komunikatën e AAK-së.

Për më tepër AAK konsideron se Raporti i Progresit përshkruan realitetin e rëndë të jetës në Kosovë, duke adresuar qartë mungesën e vullnetit politik nga institucionet qeverisëse për demokratizimin e shtetit dhe shoqërisë, reformimin e administratës publike dhe zhvillimin ekonomik.

Raporti i Progresit për Kosovën 2011 është alarm për gjendjen shqetësuese në pothuajse të gjitha sferat e jetës në Kosovë, si pasojë e mungesës së veprimeve të duhura nga institucionet qeverisëse në vend.

AAK është e bindur se ndryshimi i realitetit në Kosovë nuk mund të ndodhë me logjikën e tashme qeverisëse dhe beson se problemet e evidentuara në Raportin e Progresit duhet të shqyrtohen dhe të zgjidhen rresht për rresht, me angazhim të përkushtuar, të guximshëm dhe të paluhatshëm.