AKKP, mbi 50 pronarë dorëzojnë dokumentet

Vazhdon dorëzimi i dokumenteve nga pronarët fitues të fondit 5 mln $
 
 
 
TIRANË- Ka arritur në mbi 50 numri i subjekteve të shpronësuara që kanë dorëzuar deri më tani dokumentet pranë Agjencisë së Pronave, me anë të të cilave do të mund të marrin kompensimin financiar nga fondi i parashikuar për vitin 2007. Fluksi më i madh i subjekteve të shpronësuara, që kanë dorëzuar dokumentet pranë zyrës së Financës në Agjencinë e Pronave, është vërejtur ditën e hënë, ditë që shënonte dhe hapjen e procesit të dorëzimit të tyre. Gjatë kësaj dite numri i ish-pronarëve që kanë dorëzuar dokumentet ka arritur në 46. Por, edhe gjatë ditës së djeshme nuk ka munguar dorëzimi i dokumenteve, nga një pjesë e subjekteve të shpronësuara. Deri në orët e mesditës, pranë Zyrës së Financës ishin depozituar dokumentet për përfitimin e kompensimit financiar nga 6 subjekte të shpronësuara, ndërkohë që pritja e dokumentacionit vazhdoi edhe gjatë orëve të pasdites, deri në përfundimin e orarit zyrtar të punës. Siç bëhet e ditur nga punonjësit e zyrës së Financës, pranë AKKP-së, shumica e subjekteve të shpronësuara që janë paraqitur gjatë këtyre ditëve kanë qenë të mirë informuar mbi dokumentet që duhet të paraqisnin, për të përfituar nga fondi prej 5 milionë dollarësh i kompensimit financiar. Vetëm një pjesë shumë e vogël e këtyre subjekteve nuk kanë pasur informacionin e duhur dhe, për këtë arsye, ata janë udhëzuar nga Zyra e Financës mbi dokumentet që duhet të paraqesin. Subjektet e shpronësuara duhet të dorëzojnë pranë Agjencisë së Pronave deri në datën 29 dhjetor, dokumentet përkatëse, me anë të të cilave do të mund të marrin kompensimin financiar për pronën e tyre. Përsa i përket dokumenteve që duhet të paraqiten nga subjektet e shpronësuara, ato janë: dokument identifikimi; një numër llogarie bankare në “Reiffeisen Bank”; prokura e posaçme për të tërhequr lekët në emrin e të gjithë trashëgimtarëve të subjektit të shpronësuar apo paraqitja e të gjithë trashëgimtarëve me numër llogarie më vete në këtë institucion bankar, në rast të mungesës së prokurës së posaçme nga njeri prej trashëgimtarëve të subjekteve të shpronësuara.