Vizita, Kisha Ortodokse kërkon pronat në Voskopojë

Mitropolia e Korçës kërkon pronat në Voskopojë. Berisha premton zgjidhje, por pa u cenuar turizmi në këtë zonë turistike
Ndihma për fenë, Berisha: Taksë për besimtarët
Korçë- Kryeministri, Sali Berisha është përballur dje me shqetësimet e komuniteteve fetare për kthimin e pronave të tyre. Gjatë vizitës së djeshme në qytetin e Korçës, ndërsa dha urimet me rastin e Krishtlindjeve në Mitropolinë e Shenjtë, ku u prit nga Hirësia e tij Imzot Johani, klerikët e lartë të Kishës Ortodokse kanë paraqitur para kryeministrit Berisha kërkesat e tyre lidhur me pronat që ka kjo Kishë. Një prej këtyre kërkesave ka qenë ajo për një pronë në shkollën 9-vjeçare "Sevasti Qirjazi", ku është duke u ndërtuar një palestër. Për këtë, kryeministri Berisha pohoi se do t'i japë një zgjidhje të shpejtë problemit dhe shtoi se, Kisha duhet të marrë pronat e saj të trashëguara. Një tjetër pretendim i klerikëve ortodoksë ka qenë dhe ai për një tjetër pronë në Manastirin e Shën Prodhomit, në Voskopojë. "Ne kërkojmë kthimin e saj në pronësi të Kishës, për të ngritur atje një qendër ballkanike për fëmijë",- u shpreh Mitropoliti i Korçës. Në lidhje me këtë kërkesë, kryeministri Berisha tha se, "ishte për kthimin e kësaj prone, që aktualisht e ka në zotërim Sindikata e Pavarur, por në një zgjidhje funksionale, që të mos dëmtohet edhe zhvillimi i turizmit në Voskopojë". Për këto dhe kërkesa të tjera, Kryeministri ka garantuar se do të gjejë zgjidhjen për të respektuar dhe besimtarët e shumtë të këtij besimi, ndërkohë që ka hedhur idenë e një takse të besimtarëve, të ardhura të cilat mund të vilen prej tyre, që të përdoren në dobi të këtyre komuniteteve, si ortodokse, ashtu dhe atyre myslimane. Kryeministri Berisha u shpreh se, qeveria do të veprojë me anë të Agjencisë së Pronave për të ndihmuar procesin e kthimit të pronave për komunitetet fetare, duke theksuar se, kjo nuk i përket vetëm qeverisjes qendrore, por edhe asaj lokale. "Shteti do të përpiqet t'ju ndihmojë nëpërmjet Agjencisë së Kthimit të Pronave, por nuk i përket vetëm qeverisjes qendrore që të ketë si detyrë të parë të saj qëndrimin ndaj çështjes së pronave të komuniteteve fetare, por edhe qeverisjes lokale",- tha Kryeministri. Ndërsa premtoi se qeveria do të përpiqet të gjejë një zgjidhje të kënaqshme përsa i përket pronave të komunitetit ortodoks në Korçë, kreu i qeverisë u shpreh se do të ketë në vëmendje kthimin e pronave të vjedhura, sidomos ato që u përkasin komuniteteve fetare. "Jam për zbatimin e ligjit amerikan për pronat e vjedhura dhe do të bëj përpjekje që një ligj i tillë të kalojë edhe në Parlament. Prona e vjedhur nuk mund të trashëgohet deri në 120 breza e ne do të punojmë që të rregullojmë ligjet",- tha Kryeministri. Para pak ditësh, ka qenë vetë kreu i ekzekutivit, Berisha, që ka pranuar se prona e vjedhur nuk mund të mirëbesohet, prandaj qeveria duhet t'i japë fund situatës aktuale, kur lejohet ligjërisht pronësia mbi të patundshmet edhe për ata që nuk e miratojnë, duke shtuar se nuk mund të bëhet pasuri mbi prona të vjedhura. Ndaj, Kryeministri kërkoi që për këtë të shqyrtohej edhe Kodi Civil, qe e vjedhura të konsiderohej e tillë edhe pas 7 brezash.
 
Berisha ka hedhur idenë e një takse të besimtarëve, të ardhura të cilat mund të vilen prej tyre dhe të përdoren në dobi të këtyre komuniteteve, si ortodokse, ashtu dhe atyre myslimane.