Ajatollah Khamenei bën thirrje për qetësi publike në Iran

Udhëheqësi suprem i Iranit, Ajatollah Ali Khamenei, ka bërë thirrje për t'u dhënë fund protestave nëpër rrugë, duke thënë se "fitorja është përfundimtare" në zgjedhjet e kontestuara presidenciale që u bënë shkak për trazirat më të mëdha në Ian në tri dekadat e fundit.

Në fjalimin e tij të parë drejtuar vendit pas votimeve të 12 qershorit, Ajatollah Khamenei tha se iranianët kanë zgjedhur atë që e panë më të përshtatshëm për të shërbyer, Presidentin Mahmoud Ahmadinexhad me 63 përqind të votave.

Ajatollah Khamenei kundërshtoi akuzat se votimet ishin të manipuluara, duke thënë se fitorja me një diferencë prej 11 milionë votash për Presidentin Ahmadinexhad tregon se nuk ka patur fallsifikime. Udhëheqësi suprem i Iranit dënoi gjithashtu ndërhyrjet e huaja, siç u shpreh ai, që kanë bënë në diskutim rezultatin e zgjedhjeve.

Fjalimi i Ajatollah Ali Khameneit në televizion pasoi rreth një javë protesta masive nga përkrahësit e kandidatit që humbi zgjedhjet, Mir Hosein Musavi, i cili i kundërshtoi rezultatet e zgjedhjeve, duke thënë se votat ishin manipuluar.

Ajatollah Khamenei bëri thirrje sot për qetësi publike dhe tha se opozita do të mbahet përgjegjëse për veprimet me dhunë. //iç//