“Aktivizimi i elementëve kriminalë do ndëshkohet nga dora e rëndë e ligjit”

Ministri i Brendshëm Lulzim Basha u përgjigjet thirrjeve të opozitës për radikalizim të protestave
   
Ministri i Brendshëm Lulzim Basha ka paralajmëruar protestuesit e opozitës që të heqin dorë nga thirrjet radikale dhe nxitjen e vandalizmave. Ministri Basha apeloi për shkurajimin e aktivizimit të elementëve kriminalë, pasi në të kundërt mbi ta do të veprojë dora e ligjit. Basha tha se dhuna dhe thirrjet për dhunë do të ndeshin në qëndresën e ligjit dhe për këtë Policia e Shtetit nuk do të tolerojë asnjë akt kriminal. “Dhuna dhe thirrjet për dhunë do të marrin përgjigjen e merituar ligjore. Aktivizimi i kontingjentit kriminal nuk do të tolerohet. Ndaj bëj thirrje që të shkurajohet dhe të hiqet dorë nga aktivizimi i këtij elementi kriminal përndryshe pa asnjë pikë hezitimi mbi ta do të vijë dora e rëndë e ligjit”, u shpreh Basha.
Ministri i Brendshëm Lulzim Basha shtoi më tej se Policia e Shtetit ka garantuar dhe do të vazhdojë të garantojë në mënyrën më të plotë të drejtat kushtetuese të çdo qytetari dhe të çdo force politike për protesta paqësore.