Albano Carrisi nderohet me urdhrin Nënë Tereza

Këngëtari i njohur italian Albano Carrisi është nderuar dje nga presidenti Bamir Topi me urdhrin Nënë Tereza, i cili iu dha një prej këngëtarëve të parë ndërkombëtarë që këndonte Liberta në vitin 1989 në Tiranë. Motivimi i këtij urdhri ndalej në vlerat e humanizmit dhe të lirisë që ky personalitet i muzikës italiane ka përçuar tek publiku në të gjithë botën dhe tek ai shqiptar. Sipas zyrës së shtypit pranë presidencës, pas ekzekutimit të himnit kombëtar, Sekretari i Përgjithshëm i Institucionit të Presidentit, Aleksandër Flloko, lexoi dekretin e Kreut të Shtetit. "Personalitetit të shquar të muzikës italiane, që me artin dhe talentin e tij të rrallë evidentoi dhe përçoi tek publiku vlerat e mëdha të humanizmit, lirisë dhe të një shoqërie më të drejtë, mikut të çmuar të Shqipërisë dhe shqiptarëve, dashuria për të cilët u bë pjesë e jetës së tij", ishte motivacioni me të cilin Kreu i Shtetit dekoroi këngëtarin e njohur italian. Nga ana e tij, këngëtari Carrizi shprehu mirënjohjen për këtë vlerësim, duke shtuar se ka qenë dëshmitar i një ndryshimi pozitiv në Shqipëri. "Për mua është më e lehtë të këndoj se të flas, mbi të gjitha pasi dëgjova motivacionin e këtij takimi emocionues. Për Shqipërinë kam dëgjuar qëkurse isha i vogël, e më pas kuptova se më parë vinte Shqipëria (Albania) e pastaj Al Bano", u shpreh z. Carrizi. Duke e konsideruar emocionues takimin e parë me Shqipërinë në vitin 1989, këngëtari i njohur italian u shpreh se e përkufizon raportin me Shqipërinë "thjesht të bazuar tek emocioni i përmasave të jashtëzakonshme nga koncerti i dhënë në stadiumin e Tiranës dhe në Pallatin e Kongreseve, në 19 shtator 1989". "Kam dëgjuar gjithnjë valët muzikore Shqipëria nëpër botë e më kujtohej se që fëmijë sintonizohesha me radion e vogël që im atë kishte blerë, e cila kapte tinguj që vinin nga Shqipëria, këngë e pjesëza, falë afërsisë mes dy vendeve tona", vijoi më tej z. Carrizi. "Pasi pësoi infarkt, im atë më kërkoi: Përpara se të vdes, ti duhet të më çosh në Shqipëri. Ishte im atë që më nxiti të vij këtu, vizitë që për të dhe për mua ishte emocion tepër i madh. Vura re një reagim shumë të madh e të bukur nga ana e tij që më tregonte se ku duhej ta çoja dhe që gjithçka ishte siç e kishte lënë ai", vijon më tej kujtimet e tij këngëtari italian, Carrizi. Duke shprehur konsideratat më të larta për popullin shqiptar, z. Al Bano Carrizi theksoi se "Shqipëria zë një vend shumë të veçantë në jetën dhe historinë e familjes së tij". Më pas, Presidenti i Republikës zbuloi dhuratën simbolike të bustit të këngëtarit me famë botërore dhe shumë të dashur për shqiptarët, Al Bano Carrizi, dhuratë për të cilën vetë kantautori italian u shpreh i impresionuar. Në përfundim të ceremonisë zyrtare të dekorimit, Presidenti Topi zhvilloi një takim të shkurtër me z. Al Bano Carrizi, i cili është i pari këngëtar perëndimor që ka dhënë koncert në Shqipëri që në vitin 1989. Gjatë këtij takimi, kreu i shtetit shqiptar vlerësoi lart kontributin e këngëtarit të mirënjohur italian dhe mikut të shqiptarëve në forcimin e lidhjeve kulturore dhe shpirtërore mes dy vendeve tona.  Në ceremoninë e dekorimit të këngëtarit të njohur italian ishin të pranishëm miq të z. Carrizi, përfaqësues të Shoqatës Al Bano, artistë, si dhe anëtarë të kabinetit të Presidentit.