Alonso më i shpejti në Valencia

Fernando Alonso e filloi karrierën e tij në Ferrari në mënyrë të shkëlqyeshme, duke vendosur kohën më të shpejtë, gjatë testeve të ekipeve nga Formula 1 në Valencia, të mërkurën.

Dy herë kampioni i botës u paraqit pas kolegut të tij, Felipe Massa, dhe shënoi kohën më të mirë prej një minute 11.470 sekonda – më tepër se gjysmë sekonde dallim nga ngasësit e tjerë.

Pedro de la Rosa nga Sauber ishte i dyti, para Michael Schumacherit në Mercedes, i cili ishte 0.968 sekonda prapa Alonsos. Kampioni aktual i botës, ngasësi i McLarenit, Jenson Button e përfundoi ditën për 1.481 sekonda më ngadalë se Alonso.

Rezultatet e testeve dimërore nuk janë indikatorë të besueshëm rreth formës, për shkak të furnizimit, gomave dhe gjendjes së pistës, që mund të bëjnë dallim të konsiderueshëm në paraqitje.