Ambasadori britanik-I.Ramës: Mbështetje Prokurorisë

Prokurorja e Përgjithshme Ina Rama është takuar sot me ambasadorin e Britanisë së Madhe në Tiranë, Nicholas Cannon, në ambientet e Prokurorisë së Përgjithshme.
 

Ambasadori i Britanisë së Madhe në Tiranë, Nicholas Cannon, duke vlerësuar performancën e Prokurorisë Shqiptare në angazhimet e saj, siguroi kryeprokuroren Ina Rama për mbështetjen nga ana e Ambasadës në punën e saj dhe rikonfirmoi për vijimin e marrëdhënieve të ngushta e bashkëpunuese si me organet e akuzës në Britaninë e Madhe ashtu edhe me stafin diplomatik britanik në Tiranë.

Nga ana e saj, kryeprokurorja Ina Rama bëri një pasqyrë të punës së Prokurorisë Shqiptare duke e vënë theksin te angazhimi i këtij institucioni në rritjen e profesionalizmit, zbatimit me rigorozitet të ligjit dhe shmangia e çdo ndikimi ekstraligjor nga organet e drejtësisë. Gjithashtu, zonja Ina Rama dha një panoramë të institucioneve të zbatimit të ligjit, mënyrës si funksionojnë dhe bashkërendojnë punën, si dhe u ndal në probleme të ndryshme të reformës në sistemin e drejtësisë.

Takimi, i cili u zhvillua në kuadër të vizitave të kortezisë të ambasadorit të Britanisë së Madhe në detyrën e tij në Tiranë, pati një karakter njohës me qëllimin e forcimit të mëtejshëm të marrëdhënieve të bashkëpunimit.