Ambasadori i ri gjerman takon Nishanin, dorëzon letrat kredenciale

Tiranë- Kreu i Shtetit, Bujar Nishani ka pritur sot në një takim ambasadorin e Gjermanisë, Hellmut Hoffmann, i cili ka paraqitur letrat kredenciale me rastin e detyrës së re ku zëvendëson Carola Müller-Holtkemper, të cilës i ka përfunduar mandati më 1 korrik.

Sipas një njoftimi për shtyp të Presidencës, Hellmut Hoffmann shërben në Ministrinë e Jashtme të Republikës Federale të Gjermanisë prej vitit 1982. Katër vitet e fundit ai ka qenë drejtues i Përfaqësisë së Përhershme të Gjermanisë pranë Konferencës së Gjenevës për Carmatimin.

Marrëdhëniet mes Gjermanisë dhe Shqipërisë janë të shkëlqyera,- tha Ambasadori Hoffmann gjatë bisedës me Presidentin Nishani.
Të dyja palët angazhohen për një bashkëpunim në partneritet të ngushtë në funksion të thellimit të marrëdhënieve në të gjitha fushat.