Annan e Assad pajtohen për përfundimin e përleshjeve

Emisari ndërkombëtar për konfliktin në Siri, Kofi Annan, tha se është pajtuar me presidentin e Sirisë, Bashar Al Assad, për qasjen rreth dhënies fund të dhunës në Siri.

Annan nuk dha detaje, por tha se do ta diskutojë këtë çështje edhe me opozitën e armatosur të vendit.

Komentet e tij, Annan i bëri para gazetarëve në kryeqytetin sirian, pas një takimi dy-orësh me Assadin.

Annan është arkitekt i një plani për paqe, ndërsa në intervistën e fundit dhënë medieve ndërkombëtare ai ka theksuar se bashkësia ndërkombëtare ka qenë e paaftë ta gjejë një zgjidhje politike, për t’i ndalur përleshjet e përgjakshme në Siri.

Në anën tjetër, në një interviste për televizionin gjerman ARD, e treta për një media perëndimore, prej nisjes së trazirave marsin e 2011, Assad nënvizoi se "Amerika po bashkëpunon me terroristët”. Assad më tutje tha se nuk do të jep dorëheqje dhe se nuk i frikësohet sfidave.

Intervista u regjistrua të enjten ne Damask, nga televizioni shtetëror sirian. Assad ndër të tjera shtoi se “terroristët” në siri po ndihmohen edhe nga Arabia Saudite, Katari dhe Turqia.