Annani kërkon qeveri të unitetit në Siri

Rusia dhe forcat e tjera udhëheqëse e kanë informuar ndërmjetësuesin për Sirinë, Kofi Annan se e mbështesin idenë e tij për qeveri siriane të unitetit kombëtar, në të cilën do të ishin përfaqësues të qeverisë së tanishme dhe opozitës, konfirmuan diplomatë për mediat perëndimore.

Sipas tyre, propozimi është një ndër temat kryesore të cilat do t'i shqyrtojnë anëtarët e KS-së të OKB-së dhe "lojtarë" të tjerë të rëndësishëm në Lindjen e Afërt të shtunën, në takimin në Gjenevë përkushtuar konfliktit në Siri.

Burimet thonë se qeveria eventuale e unitetit kombëtar mund të përfshijë anëtarë të qeverisë së tanishme, përfaqësues të opozitës dhe të tjerë, por në të nuk do të hynin persona "pjesëmarrja e të cilëve do të ishte kërcënim për shpresat për tranzicion politik ose do t'i pengonte në përpjekjet për pajtim dhe stabilitet".

Sipas tyre, ideja për përjashtim të personave të caktuar dukshëm i referohet Bashar Assadit, edhe pse në propozimin e Annanit nuk përmendet qartë se presidenti sirian nuk mund të marrë pjesë në qeverinë e unitetit kombëtar.

Në anën tjetër, Shtetet e Bashkuara kanë dënuar sulmin me pasoja vdekjeprurëse kundër një stacioni televiziv pro-qeveritar dhe thonë se shpresojnë që takimin e fuqive botërore në Gjenevë do të shënojnë një pikë kthesë në zgjidhjen e konfliktit 15 mujor në Siri.