Arrestohet i 14-ti për vrasjen në Malishevë

Andi Krasniqi, është personi i 14-të i arrestuar, si i dyshuar për përfshirje në vrasjen e ndodhur më 1 janar në Banjë të Malishevës. Lajmi është konfirmuar nga Policia e Kosovës.

Baki Kelani, zëdhënës i policisë ka bërë të ditur se arrestimi ka ndodhur gjatë së shtunës, afër Fakultetit Ekonomik në Prishtinë.

“Me urdhër të Prokurorit Publik, i dyshuari është dërguar në qendrën e mbajtjes në Prishtinë”, ka thënë Kelani. Me arrestimin e Andi Krasniqit, numri i të arrestuarve për vrasjen e Skender Limajt ka shkuar në 14.

Skender Limaj është vrarë mbrëmjen e 1 janarit, në pronën e tij në fshatin Banjë të Malishevës ndërsa janë plagosur edhe dy persona të tjerë. Gjysmë muaji më vonë, policia ende nuk ka dhënë motivet e këtij rasti.