Asad: Vendi është në gjendje të vërtetë lufte

Presidenti i Sirisë, Bashar al-Asad, tha se vendi i tij është në gjendje lufte, pasi qeveria e tij po ballafaqohet me kryengritje dhe protesta civile.

Në mbledhjen e qeverisë, mbrëmë vonë, ai tha se ne jetojmë në gjendje të vërtetë lufte nga të gjitha anët, dhe shtoi se, të gjitha politikat në të gjitha anët dhe sektorët duhet të drejtohen në fitimin e kësaj lufte.

Bashar al-Asad, po ashtu, i ka hedhur poshtë thirrjet nga vendet perëndimore që të tërhiqet, duke  thënë se perëndimi merr dhe asnjëherë nuk jep dhe kjo është dëshmuar në secilën etapë. Komentet e tij u transmetuam drejtëpërdrejt në Televizionin shtetëror të Sirisë.

Kombet e Bashkuara e kanë akuzuar ushtrinë e Sirisë për vrasjen e më se 10 mijë njerëzve gjatë 16 muajve të kryengritjes, që paraqet kërcënimin më të madh për katër dekadat e sundimit të familjes Asad në këtë vend