Ashton së shpejti në Tiranë

Bashkimi Evropian po përgatitet për të ndërhyrë intensivisht në atë që për ta quhet “kriza shqiptare”.

Pas dy takimeve të të dërguarit të posaçëm të BE-së për këtë çështje, Miroslav Lajcak, evropianët kanë vendosur ta rrisin nivelin e përfaqësimit në Shqipëri, duke dërguar në Tiranë përfaqësuesen e lartë të Punëve të Jashtme dhe Sigurisë, Baroneshën Catherine Ashton.

Vizita e saj në Shqipëri pritet të konkretizohet javën e ardhshme, pas përfundimit të vizitës së Ashton në Tunizi.

Gjatë kësaj vizite, që pritet të jetë e shkurtër, Ashton do të takojë krerët më të lartë të politikës në vend, Kryeministrin Sali Berisha, Presidentin Bamir Topi dhe kreun e opozitës, Edi Rama.

Duket se misioni i Baroneshës Ashton do të përqendrohet në uljen e palëve në një tryezë për të gjetur edhe një marrëveshje, e cila do të siguronte zgjidhje të krizës politike.

Pas dy vizitave që i dërguari i saj për Shqipërinë, Miroslav Lajcak ka zhvilluar me secilin nga aktorët politikë të përfshirë në këtë konflikt, Ashton duket se ka mbi tryezën e saj të punës të gjithë informacionin e nevojshëm që duhet për të analizuar situatën dhe për të evidentuar pikat e qarta që i mbajnë palët larg njëra- tjetrës.