Asnjë marrëveshje, dialogu vazhdon të enjten

(E plotësuar) Dialogu mes delegacionit të Kosovës dhe Serbisë do të vazhdojë nesër në mëngjes, kanë deklaruar zyrtarë të BE-së për agjencinë serbe të lajmeve Beta.

Takimi i sotëm maratonik nuk ka prodhuar asnjë marrëveshje, sipas burimeve të KosovaTimes.

Por, zyrtarë të Bashkimit Evropian kanë thënë se është arritur “një përparim i mirë” në temën për menaxhimin e integruar të kufijve.

Përpjekje për marrëveshje

Dialogu ndërmjet Kosovës dhe Serbisë me ndërmjetësimin e Bashkimit Evropian, i nisur të mërkurën në mëngjes, ka vazhduar deri në orët e vona të mbrëmjes, ndërkohë që burime të Bashkimit Evropian konfirmojnë se gjatë ditës janë orvatur që palët të arrijnë marrëveshje rreth disa pikave.

Sipas burimeve nga BE-ja, tema kryesore të debatit në dialog kanë qenë integrimi i menaxhuar i kufirit dhe përpjekja e Bashkimit Evropian për të arritur një marrëveshje rreth pjesëmarrjes së Kosovës në nismat rajonale që është në kuadër të temës “Bashkëpunimi rajonal”. /rel/