Atentat me municione nga oxhaku, enigmë shkaqet

MAT – Atentat me fishekë dhe granata nga oxhaku i shtëpisë. Kjo gjë i ka ndodhur familjes Keka në fshatin Xibër Murrizë të Matit. Ishte ora 21:00 dhe si çdo natë, tre anëtarët e familjes Keka ishin mbledhur në shtëpinë e tyre gati për të fjetur gjumë, por një zhurmë nga tarraca e shtëpisë i ka frikësuar ndërsa nga oxhaku janë hedhur municione të llojit fishekë dhe granata. Të tmerruar ata kanë dalë menjëherë jashtë shtëpisë, ndërsa shpërthimi i municioneve, që u dëgjua edhe nga fqinjët, dëmtoi një pjesë të mirë të orendive. Ende nuk ka të dyshuar për ngjarjen, të cilën familja Keka e konsideron si atentat. Një ndër pistat në të cilat po hetohet është ajo e një konflikti të mundshëm pronësie.

Pranga faturistit të OSSH-së, shkaktoi një dëm prej 2.6 milionë lekësh

TIRANË – Prangoset faturisti i OSSH-së, shkaktoi një dëm prej 2.6 milionë lekësh. Policia e Tiranës ka vënë në pranga ditën e djeshme Lirjan Qiricin, 37 vjeç, lindur në Përmet dhe banues në Tiranë. Ndaj tij, Gjykata e Tiranës, me vendim të datës 22 janar 2010, ka vendosur masës së sigurisë “arrest në shtëpi”, pasi në bazë të procedimit penal të Prokurorisë së Rrethit Gjyqësor Tiranë mbi bazën e një kallëzimi penal të bërë nga OSSH Tiranë, u mundësua dokumentimi ligjor i konsumimit të veprës penale të “shpërdorimit të detyrës”. Dyshohet se Lirjan Qirici, gjatë periudhës që ka qenë i punësuar si faturist i energjisë elektrike pranë OSSH-së, Dega Tiranë, ka sjellë një dëm ekonomik prej 2 600 000 lekësh. Materialet hetimore të përpiluara në ngarkim të tij do t’i kalojnë Prokurorisë së Rrethit Gjyqësor Tiranë, për veprime të mëtejshme.

26 Janar 2010