Avokatët e Dritan Dajtit “braktisin” procesin

TIRANE - Gjykata për Krimet e Rënda shtyu dje procesin gjyqësor në ngarkim të Dritan Dajtit, të akuzuarit për vrasjen e 4 policëve në Durrës dhe dy të bashkëpandehurve të tij, Ergest Xhoxhi dhe Mariglen Muça. Shkak për shtyrjen e seancës u bë mbetja pa mbrojtje e të pandehurit Xhoxhi. Ndërkohë që avokatja e caktuar kryesisht nga gjykata, për mbrojtjen e interesave të të pandehurit Dritan Dajti, paralajmëroi ardhjen e tij në gjykatë në seancën e ardhshme. “Kam kontaktuar me klientin tim dhe më ka pohuar se në seancën e ardhshme do të jetë i pranishëm”, u shpreh avokatja Valentina Teodoresku. Avokati tjetër në proces u largua dje nga seanca për arsye familjare. Për rrjedhojë mbeti pa mbrojtje i pandehuri Ergest Xhoxhi, që çoi më pas në dështimin e seancës. Seanca e djeshme ishte e 11-ta në radhën e seancave të këtij procesi. I pandehuri kryesor i kësaj dosjeje, Dritan Dajti, nuk është paraqitur në asnjë seancë. Në njoftimet dërguar gjykatës, Dajti ka pretenduar pamundësi shëndetësore për t’u paraqitur para togave të zeza. ar.ba