Avokati i Popullit do të zgjidhet në shkurt

Prishtinë - Avokati i Popullit do të zgjidhet në seancën e parë parlamentare që do të mblidhet në muajin shkurt. Kjo u vendos gjatë mbledhjes së Kryesisë së Kuvendit të Kosovës e cila ka shqyrtuar Rekomandimin e Komisionit për Legjislacion dhe Gjyqësi për zgjedhjen e Avokatit të Popullit, duke konkluduar se janë përmbushur kushtet për zgjedhjen e tij.

Gjatë takimit u diskuatua gjithashtu edhe Strategjia Legjislative e Qeveris së Kosovës për vitin 2009, në të cilën janë paraparë 104 projektligje, që duhet të hartohen nga ministritë përkatëse, në afatin e përcaktuar kohor. Kryesia ka vendosur që secili komision parlamentar i Kuvendit ta përgatisë programin e tij të punës konform kësaj strategjie legjislative dhe të ligjeve që duhet t’i shqyrtojnë si komisione funksionale. Kryesia, ndërkaq, ka autorizuar sekretarin e Kuvendit që në bazë të kësaj strategjie dhe programeve të komisioneve parlamentare ta përgatisë për Kryesinë një plan të punës së Kuvendit për shqyrtimin dhe miratimin e ligjeve, i cili duhet të aprovohet nga seanca.

Po në këtë mbledhje të Kryesisë është shqyrtuar përgjigja e Qeverisë së Kosovës në mocionin e gjashtë deputetëve lidhur me hartimin e Projektligjit kundër dhunës në familje, në të cilën thuhet se projektligji në fjalë është paraparë në Strategjinë Legjislative të Qeveris së Kosovës për vitin 2009.