BE: Prioritet kthimi i normalitetit në veri
Kthimi i normalitetit në veri, luftimi i krimit të organizuar dhe korrupsionit bashkë me liberalizimin e vizave, janë potencuar si top prioritetet e strukturave të BE-së të angazhuara në Kosovë.
Këto komente, Zhbogar dhe Marnak i kanë bërë gjatë një pritjeje të përbashkët për media. Me këtë rast, Përfaqësuesi i BE-së, prej tani e tutje edhe Shefi i Zyrës së BE-së, Samuel Zhbogar edhe zyrtarisht ka nisur punën e tij në këtë post.
Ai tha se do ta mbështesë në vazhdimësi dialogun midis Prishtinës dhe Beogradit si dhe do të angazhohet që t’i ndihmojë institucionet në procesin e liberalizimit të vizave. Njëherësh, ka thënë Zhbogar, BE do të ndihmojë në vazhdimësi edhe në procesin e kthimit të rendit dhe ligjit në veri.
Të njëjtat prioritete i ka përmendur më pas edhe shefi i misionit të BE-së për sundim të ligjit – EULEX, Ksavier de Marnak. "Ndihmesa e EULEX-it për institucionet në procesin e liberalizimit të vizave, luftimi i krimit të organizuar dhe korrupsionit si dhe vendosja e rendit dhe ligjit në veri janë tri prioritetet e EULEX-it", ka thënë Marnak, raporton Radio Evropa e Lirë.
Ndryshe, ministri i deritashëm i Punëve të Jashtme të Sllovenisë, Samuel Zhbogar, u emërua në krye të Zyrës së BE-së në Kosovë, më 21 dhjetor 2011. Të martën ai pritet të nisë edhe takimet e para me udhëheqësit e institucioneve të Kosovës.