BEOGRAD – Serbia e quan “provokim” marrëveshjen e mbrojtjes Shqipëri-Kosovë-Kroaci

BEOGRAD, 20 mars /ATSH/- Një marrëveshje e mbrojtjes midis Kroacisë, Shqipërisë dhe Kosovës, që bën thirrje për përgjigje ndaj sfidave të përbashkëta të sigurisë, ka shkaktuar një reagim të Serbisë, e cila e quajti atë një veprim kërcënues, sipas “Balkan Insight”.

Një marrëveshje e mbrojtjes e nënshkruar midis Kroacisë, Shqipërisë dhe Kosovës ka ndezur një grindje diplomatike me Serbinë, e cila ende e sheh Kosovën si pjesë të territorit të saj dhe nuk e njeh pavarësinë e saj.

Presidenti serb, Aleksandar Vuçiç akuzoi Kroacinë dhe Shqipërinë për fillimin e një “gare armatimi” në rajon duke nënshkruar një marrëveshje me ato që ai i quajti “institucionet e përkohshme” në Kosovë, që do të thotë qeveria e vendit.

“Është një situatë e vështirë për ne, por ne e kemi kuptuar mesazhin e tyre. Dhe ne do ta mbrojmë vendin tonë, do t’i pengojmë ata dhe gjithmonë do ta mbrojmë me sukses nga çdo agresor potencial, qoftë ky edhe i fuqishëm”, tha dje Vuçiç.

Por, Kroacia tha se nuk kishte nevojë për lejen e Serbisë për të nënshkruar një marrëveshje.

Ministri i Mbrojtjes, Ivan Anusic tha se koha kur Zagrebi kërkonte miratimin e Beogradit për veprimet e tij kishte kaluar prej kohësh dhe nuk do të kthehej më.

“Ne kemi qenë një shtet i pavarur për 35 vjet dhe kemi duruar pesë vjet agresioni dhe politikash që promovuan një narrativë të tillë”, tha Anusic, duke iu referuar luftës së pavarësisë së Kroacisë në vitet 1990 kundër ushtrisë jugosllave të udhëhequr nga Serbia.

“Bashkëpunimi me Shqipërinë dhe Kosovën fokusohet në shkëmbimin e njohurive, bashkëpunimin ndërmjet industrive ushtarake dhe mbështetjen për aspiratat euroatlantike të Shqipërisë dhe Kosovës”, tha Anusic në X.

Mosmarrëveshja u shfaq pasi Kroacia, Shqipëria dhe Kosova nënshkruan të martën “Deklaratën për Forcimin e Bashkëpunimit të Mbrojtjes”.

“Deklarata, së cilës mund t’i bashkohen edhe vendet e tjera, bën thirrje për përgjigje të përbashkëta ndaj sfidave të sigurisë, kërcënimeve hibride dhe rreziqeve të tjera që mund të kërcënojnë stabilitetin rajonal”, deklaroi Ministria Kroate e Mbrojtjes pas nënshkrimit të marrëveshjes.

Por, ministri i Mbrojtjes i Serbisë, Bratislav Gasic e quajti atë një “iniciativë provokuese” nga vendet fqinje.

“Nënshkrimi i memorandumit pa një konsultim me Beogradin paraqet konfirmimin e korrektësisë së investimit strategjik në forcimin dhe modernizimin e Forcave të Armatosura Serbe”, tha Gasic.

“Është një iniciativë provokuese e shteteve fqinje që është në kundërshtim me përpjekjet për të forcuar sigurinë rajonale”, shtoi ai.

Ministrja e Jashtme e Kosovës ,Donika Gervalla-Schwarz u përgjigj duke shkruar në X se ajo dënonte fuqishëm deklaratën kërcënuese të Serbisë dhe akuzoi Beogradin se kërkon të vazhdojë politikat e tij hegjemoniste në rajon.

Gervalla-Schwarz shtoi se Serbia nuk mund të jetë faktor stabiliteti pa e njohur Kosovën.

Ministria e Jashtme e Kosovës gjithashtu i kërkoi Serbisë që të zbatojë marrëveshjet ekzistuese. Të dy vendet arritën një marrëveshje normalizimi të marrëdhënieve, të lehtësuar nga BE-ja, në shkurt 2023.

Marrëveshja thoshte se vendet duhet të zhvillonin marrëdhënie normale, të fqinjësisë së mirë me njëri-tjetrin mbi bazën e të drejtave të barabarta dhe të udhëhiqeshin nga respektimi reciprok për pavarësinë, autonominë dhe integritetin e tyre territorial, të drejtën e vetëvendosjes, mbrojtjen e të drejtave të njeriut dhe mosdiskriminimin. //a.i/