BERZH, 1 milion euro për bizneset e vogla

Banka Evropiane për Rindërtim e Zhvillim akordon një fond prej 1 milion eurosh për ti ardhur në ndihmë biznesit të vogël në Shqipëri. Me anë të një njoftimi për shtyp mësohet se BERZH po mbështet zhvillimin e sektorit të leasing (qirasë financiare) në Shqipëri

me një hua prej 1 milion Euro për Landeslease, e cila do të përdoret nga shoqëria për të zgjeruar shërbimet e saj për ndërmarrjet e vogla dhe të mesme (NVM). Sipas njoftimit mësohet se në një periudhë ku bizneset përballen me mundësi të limituara për mekanizma financues, qiraja financiare shërben si një burim alternativ financimi për zhvillimin e NVM-ve, të cilat janë vendimtare në transformimin strukturor të ekonomisë. Sektori i leasing në Shqipëri është akoma në fazat e hershme të zhvillimit duke përfaqësuar vetëm një për qind të PBB-së së vendit.  Sipas të njëjtave burime mësohet se  krijuar në vitin 2005, qiraja financiare është shoqëria e parë e kësaj natyre e pavarur në Shqipëri. Shoqëria po përqendrohet kryesisht në ndërmarrjet e vogla dhe të mesme dhe ka eksperienca të shkuara në leasing për automjetet, pajisjet dhe makineritë. Linja e kredisë së BERZH-it do të ndihmojë Landeslease të zgjerojë bazat e saj të financimit dhe do të mbështesë shoqërinë në aktivitetin e saj për të siguruar mjete financuese më të arsyeshme për NVM-të në Shqipëri. Gjithashtu, projekti do të shërbejë si një shembull pozitiv për shoqëritë e reja leasing për të konsideruar hyrjen në tregun shqiptar, duke rritur zhvillimin e sektorit të leasing. Nëpërmjet kësaj marrëveshjeje, BERZH po ndihmon Landeslease të zgjerojë portofolin e saj për leasing dhe të përmirësojë mundësinë e financimit për ndërmarrjet e vogla dhe të mesme në Shqipëri u shpreh Daniel Berg, Drejtor i Zyrës së BERZH-it në Tiranë. Mbështetja financiare e siguruar nga BERZH-i u mundësua në sajë të performancës të mirë të Landeslease, dhe na jep një nxitje të madhe për të vazhduar strategjinë tonë të zhvillimit që synon të sigurojë zgjidhje financiare për të plotësuar nevojat e bizneseve të vogla dhe të mesme në Shqipëri u shpreh Altin Saliasi, Drejtor i Përgjithshëm i Landeslease.  Që në fillim të veprimtarisë së saj në Shqipëri, BERZH ka investuar mbi 550 milion Euro në sektorë të ndryshëm të ekonomisë së vendit, duke mobilizuar investime shtesë prej më shumë se 1 miliard Euro.

Last Updated on E Enjte, 22 Prill 2010 18:45