BRUKSEL – Autoriteti Palestinez përshëndet planin belg për njohjen e shtetit

BRUKSEL, 2 shtator /ATSH–DPA/ – Ministria e Jashtme palestineze mirëpriti sot planet e qeverisë belge për të njohur shtetin palestinez, në Asamblenë e Përgjithshme të OKB-së këtë muaj.

Ministri i Jashtëm belg, Maxime Prevot, tha sot se vendimi do të hynte në fuqi vetëm pasi pengu i fundit të lirohet nga Gaza dhe Hamasi të jetë çmilitarizuar.

“Ky qëndrim parimor është plotësisht në përputhje me të drejtën ndërkombëtare, rezolutat e OKB-së dhe mbrojtjen e zgjidhjes me dy shtete, dhe përfaqëson mbështetje jetësore për arritjen e një paqeje të drejtë dhe të qëndrueshme”, shkroi Ministria palestineze e Punëve të Jashtme në X.

“Ministria u bën thirrje të gjitha shteteve që ende nuk e kanë njohur shtetin e Palestinës ta bëjnë këtë urgjentisht”, tha ajo.

Njohja e shtetit të  Palestines do të “intensifikonte përpjekjet praktike për të ndaluar krimet e Izraelit për gjenocid, zhvendosje të detyruar, urinë dhe aneksimin, duke hapur njëkohësisht një horizont të vërtetë politik për të zgjidhur konfliktin dhe për t’i dhënë fund pushtimit izraelit të shtetit të Palestinës”.

Prevot njoftoi gjithashtu se do të ndërmerren veprime të forta kundër qeverisë izraelite dhe kundër çdo “antisemitizmi ose glorifikimi të terrorizmit nga mbështetësit e Hamasit”.

Ministri belg përmendi “tragjedinë humanitare në Palestinë, dhe në veçanti në Gaza”, si dhe “dhunën e ushtruar nga Izraeli në shkelje të së drejtës ndërkombëtare” dhe “dështimin e vendit për të parandaluar rrezikun e gjenocidit” si arsye pas vendimit.

“Kjo nuk ka të bëjë me sanksionimin e popullit izraelit, por me sigurimin që qeveria e tyre të respektojë të drejtën ndërkombëtare dhe humanitare dhe të ndërmarrë veprime për të ndryshuar situatën në terren”, vazhdoi Ministria e Jashtme belge./   /Ad.Ab./