BRUKSEL – Von der Leyen: BE dhe Malajzia rifillojnë bisedimet për marrëveshjen e tregtisë së lirë

BRUKSEL, 20 janar /ATSH-DPA/- Bashkimi Evropian dhe Malajzia po planifikojnë të rifillojnë negociatat për një marrëveshje të tregtisë së lirë, njoftoi sot blloku.

“Ky lajm i shkëlqyer vjen në një kohë kritike kur tensionet gjeopolitike po përshkallëzohen dhe rreziku i destabilitetit po rritet”, tha presidentja e Komisionit Evropian Ursula von der Leyen.

“Ndërsa disa kthehen drejt izolimit dhe copëzimit, Evropa dhe Malajzia po zgjedhin një rrugë tjetër: arritjen, ndërtimin e partneriteteve dhe krijimin e mundësive të reja për njerëzit tanë”, tha ajo, disa orë përpara ceremonisë së betimit të Donald Trump si president i SHBA-së.

“Tregtia e mallrave midis BE-së dhe Malajzisë u vlerësua në 45 miliardë euro (46,7 miliardë dollarë) në 2023 dhe tregtia në shërbime arriti një vëllim prej 11 miliardë euro në 2022”, sipas shifrave të komisionit.

“Marrëveshja do të përmirësojë konkurrencën e bllokut me mundësi të reja biznesi dhe zinxhirë më të mirë furnizimi”, tha komisioni, duke shtuar se gjithashtu përfshihen angazhimet për të drejtat e punës dhe mbrojtjen e klimës dhe mjedisit në marrëveshje.

Negociatat për një marrëveshje të tregtisë së lirë midis BE-së dhe Malajzisë filluan fillimisht në vitin 2010, por u ndërprenë në vitin 2012 me kërkesë të qeverisë malajziane.

“Tregtia e lirë dhe e drejtë do të thotë zgjedhje dhe çmime më të mira. Do të thotë gjithashtu më pak rrezik, pasi integrimi dhe diversifikimi i zinxhirëve të furnizimit forcon sigurinë tonë ekonomike”, tha Von der Leyen.

Kthimi i Trump në Shtëpinë e Bardhë, tensionet me Kinën dhe sanksionet ekonomike ndaj Rusisë kanë nxitur Brukselin drejt lidhjeve më të thella tregtare me ekonomitë e tjera.

Në muajt e fundit, BE-ja arriti një marrëveshje tregtare me katër vendet e bllokut tregtar të Amerikës Latine Mercosur – Argjentina, Brazili, Paraguaji dhe Uruguai – dhe modernizoi një marrëveshje me Meksikën. //a.i/