Bankat ngrijnë Delijorgjin

TIRANË - Paralelisht me hetimin për nxjerrjen e përgjegjësve të tragjedisë së Gërdecit, grupi hetimor i çështjes i kushtoi një vëmendje të veçantë identifikimit dhe bllokimit të pronave, apo llogarive bankare që rezultojnë në emër të Mihal Delijorgjit, administrator i firmës “Albademil”. Pas vendimit të gjykatës që sekuestroi paraprakisht pronat e Delijorgjit, tashmë çështja i ka kaluar Zyrës së Përmbarimit, e cila ka nisur menjëherë nga puna për zbatimin e vendimit të gjykatës. Menjëherë pas marrjes së vendimit të gjykatës, Zyra e Përmbarimit Gjyqësor Tiranë ka ngritur një grup të veçantë pune, i cili po verifikon një për një të gjitha pasuritë e sekuestruara. Burime nga ky institucion thanë dje, se është shpërndarë vendimi i gjykatës për bllokimin e llogarive bankare të Delijorgjit në 16 banka në Tiranë, si dhe në Zyrën e Regjistrimit të Pasurive të Paluajtshme. Sipas vendimit të gjykatës, bëhet fjalë për sekuestrimin e 29 pronave që ndodhen kryesisht në Tiranë, Durrës dhe Gjirokastër, si dhe 33 llogarive bankare, vlera e së cilave arrin në 1 milion euro. Mihal Delijorgji, një nga biznesmenët më të fuqishëm të skrapit, u ndalua me urdhër të Prokurorisë së Tiranës më 17 mars, pasi dyshohet të ketë konsumuar elemente të veprës penale “shkelje të rregullave mbi lëndët plasëse, djegëse dhe radioaktive”. L.Bakillari