Barcelona e Santos nisin garën drejt trofeut

Barcelona dhe Santos u njohën me kundërshtarët e tyre në rrugën drejt trofeut të Botërorit të Klubeve. Për Barcelonën duket se nuk do të jetë e vështirë për të siguruar finalen që do të zhvillohet në Japoni në muajin dhjetor. Skuadra katalanase, që konsiderohet si pretendentja kryesore për të fituar këtë aktivitet, u ndihmua edhe nga shorti. Në gjysmëfinale, skuadra e drejtuar nga Pep Guardiola arriti të shmangë meksikanët e Monterrej dhe në gjysmëfinale do të përballet me fituesin e ciftit Al Saad-Esperans, skuadra këto që paraqesin një rrezik minimal për kampionët e Europës në letër. Ndërkaq, Santos ka shumë mundësi që të ketë si skuadër rivale në gjysmëfinale të Botërorit të Klubeve skuadrën e Monterrej. Por meksikanët fillimisht duhet të luajnë cerekfinalen e këtij aktiviteti që do ta luajë me fituesen e ndeshjes mes Oakland City dhe skuadrës që do të shpallet kampione e Japonisë. Për sa i përket finales së Botërorit të klubeve, ajo do të luhet në 18 dhjetor në 10:30 sipas orës europiane.