Barcelona nje 2010 per Oskar Guardiola dhe makina e golave

Fjalët, epitet për të përshkruar këtë Barcelonë, kanë mbaruar tashmë prej disa kohësh, prandaj nuk na mbetet tjetër, veçse të flasim për numrat. Shifra impresionuese për skuadrën e Guardiolës në vitin kalendarik 2010. Ndeshjet zyrtare të luajtura janë 57: të fituara 44, të barazuara 8 dhe të humbura 5. Por ata që bëjnë më shumë përshtypje janë 154 golat e shënuar, më shumë se një e treta të shënuar nga Mesi (58). Me një sulm të tillë mendohet një kujdes më i vogël për mbrojtjen, por jo. Valdes dhe kolegët kanë “nxjerrë” vetëm 40 topa nga rrjeta. Pesë humbje, tre të lehta e dy të rënda në të gjithë 2010-n. Humbja ndaj Atletiko Madrid në La Liga në ditët e të dashuruarve nuk u shkaktoi probleme blaugranëve për rikonfirmimin në kampionat. As ajo e ndeshjes së parë të Superkupës spanjolle ndaj Seviljas (3-1). Humbja e fundit në termat e kohës ishte e rëndë (0-2) në “Kamp Nou” ndaj Herkules, por megjithatë djemtë e Guardiolës kryesojnë klasifikimin me dy pikë avantazh ndaj Realit. Dhe vijmë te humbjet e dhimbshme, në Kupën e Mbretit dhe në Champions League. Në kupën kombëtare ishte fatale sërish ndaj Seviljes, ndërsa në Europë, 3-1 i San Siros ndaj Interit dhëmbi shumë. Numra që nuk janë vlerësuar me çmimet e duhura, nëse jo nga kritika dhe tifozët e gjysmës së botës, sepse 44 fitore janë një ecuri për t’u pasur zile dhe të denja për trofe. Në ndeshjet e fituara janë shënuar shumë gola. Një ekzagjerim 154 golat e shënuar në 57 ndeshje. Një mesatare 2,7 gola për ndeshje. Numra që shndërrohen në “jashtëtokësorë”, kur analizon golat e pësuar: vetëm 40. E vetmja ndeshje pa shënuar ishte derbi i Barcelonës me Espanyol më 17 prill (0-0). Mesi është drita e kësaj Barcelone me 58 gola të shënuar, më shumë se një e treta. Një 2010 fantastike për “Pleshtin”, i aftë të shënojë 25 gola në 23 ndeshje të La Ligas 2009-‘10. Mesatarja, që argjentinasi po e mban edhe në sezonin 2010-‘11 me 17 gola në 16 ndeshje. Numra fantashkencë për një sulmues normal. Në La Liga-n aktuale Barça udhëton me një mesatare prej 3 golash për ndeshje: e aftë ti shënojë edhe 5 herë Realit të Murinjos e Kristiano Ronaldos. Numra që mund të pasurohen me ndeshjen e fundit të 1/8 të Kupës së Mbretit kundër Athletik Bilbaos më 21 dhjetor. Një makinë e vërtetë golash, skuadra e drejtuar nga Guardiola, ndoshta krijesa më e bukur e pa krijuar kurrë në futboll, por këto janë diskutime, që duhet t’u lëmë kohën t’i vërtetojë. Numrat e prezantojnë më të mirë se çdo skuadër tjetër këtë Barcelonë.