Bariu vret kolegun, tenton të mashtrojë policinë

 

TIRANE - Bariu vret kolegun pas grindjes në gjendje të dehur dhe denoncon në polici, duke pretenduar se viktima kishte vrarë veten. Ngjarja ka ndodhur në bregdetin e Kavajës, në një stan të fshatit Karpen të komunës së Syneit, ku Arjan Grami 35 vjeç, nga Ndroqi i Tiranës, ka vrarë me armë zjarri pistoletë bariun tjetër, nga Vlora, Kastriot Godole 26 vjeç. Krimi është kryer të martën në mbrëmje në stanin e fshatit Karpen, pranë ish-rezervatit të peshkut. Të dy barinjtë ishin të punësuar nga pronari i stanit për të ruajtur një tufë delesh. Policia është njoftuar të mërkurën në darkë, nga vetë autori i krimit. "Shoku im i punës ka vrarë veten", - mësohet të ketë pohuar për policinë 34-vjeçari nga Tirana. Pas mbërritjes së policisë në vendin e ngjarjes, ata kanë vënë re se viktima kishte së paku 6 plagë në trup, në kokë e në pjesë të tjera të organizmit. Fare pranë ndodhej edhe pistoleta e krimit, e cila është marrë nga policia bashkë me gëzhojat dhe disa predha të gjetura aty. Ato janë administruar prej hetuesve si prova materiale, ndërsa ekspertët kanë kryer këqyrjen e vendit të ngjarjes. Këta të fundit nuk kanë lënë vend për dyshime se ngjarja ishte vrasje dhe jo vetëvrasje, siç kishte pretenduar Arjan Grami. Ai është shoqëruar në Komisariatin e Kavajës dhe gjatë marrjes në pyetje ka pranuar autorësinë e krimit. Bariu ka pohuar pas këmbënguljes së hetuesve, ka pranuar se kishte vrarë shokun e tij, pasi ai kishte rënë të flinte. Shkak, sipas tij, ishte bërë një grindje që ata kishin filluar në lokal kur kishin qenë në gjendje të dehur.               d.b