Basha përfundimisht kryetar i Tiranës

Kolegji Zgjedhor rrëzoi kërkesë-padinë e Partisë Socialiste më të cilën kërkohej që KQZ-ja të shqyrtojë ankesën për pavlefshmëri të rezultatit të 284 qendrave të votimit në Tiranë.

Përgjegjësja e çështjes, Shasenka Jonuzi në shpalljen e këtij vendi argumentoi se kërkesë-padia e PS e dorëzuar më 2 korrik është dorëzuar jashtë afateve të caktuara.

“Kolegji Zgjedhor në bazë të nenit 135 vendosi rrëzimin e kërkesë padisë së Partisë Socialiste për shkak të tejkalimit të afateve të dorëzimit të kërkesë-padisë”, tha Jonuzi.

Me këtë vendim të Kolegjit, mbetet në fuqi fitorja në Tiranë e kandidatit të djathtë, Lulzim Basha me 93 vota para ndaj kundërshtarit, Edi Rama.