Bashkëpunimi Indi-Pakistan, element kyç për suksesin në Afganistan

Pakistani dhe Shtetet e Bashkuara po punojnë për të forcuar sërish marrëdhëniet e tyre, ndërkohë që Washingtoni po përgatitet për të tërhequr trupat ushtarake nga Afganistani fqinj. Por disa analistë besojnë se faktori më i rëndësishëm për paqen në rajon janë lidhjet midis Pakistanit dhe Indisë.

Analistët në Washington thonë se marrëdhëniet mes Pakistanit dhe Indisë mund të shndërrohen në faktorin më të rëndësishëm për të ardhmen e Afganistanit dhe se Washingtoni mund të luajë një rol më të madh në inkurajimin e një bashkëpunimi midis dy rivalëve, të cilët zotërojnë armë bërthamore.

Hassan Abass është profesor i Sigurisë Ndërkombëtare në Universitetin e Mbrojtjes Kombëtare në Washington. Profesori Abass thotë se ai mendon se rajoni do të përballet me kohë të vështira, nëse Shtetet e Bashkuara tërheqin trupat ushtarake në vitin 2014, nga një Afganistan politikisht dhe ekonomikisht i dobët, pa një konsensus të fortë rajonal.

Çelësi, thotë Abass, është bashkëpunimi në mes Indisë dhe Pakistanit.

Por profesor Abass thotë se, pavarësisht marrëdhënieve të përmirësuara kohët e fundit, të dyja palët vazhdojnë të përpiqen që nëpërmjet mjeteve të ndryshme të ushtrojnë ndikim në Afganistan.