Basti i fundit

Shtatëmbëdhjetë persona, përfshirë ish kapitenin e Atalantas, Cristiano Doni, janë arrestuar të hënën dhe gjenden në paraburgim të akuzuar për kurdisje të ndeshjeve. Operacioni i quajtur “Basti i fundit” është kryer në qytete të ndryshme në Itali, pas hetimeve të prokurorisë së Cremonas. Të arrestuarit thuhet se kanë qenë në kontakt me banda kriminale nga Singapori dhe Evropa Lindore.

Mëngjesin e së hënës ka ardhur një tjetër goditje ndaj korrupsionit në futbollin italian. 17 persona janë arrestuar dhe gjenden në paraburgim, të akuzuar për kurdisje të ndeshjeve.

Në mesin e të arrestuarve është ish mesfushori i Atalantas dhe i Kombëtares italiane, Cristiano Doni. Ish kapiteni i Atalantas është aktualisht i dënuar nga drejtësia sportive, pas kurdisjes së të paktën tri ndeshjeve në Serie B sezonin e kaluar.

Operacioni që mban emrin “Basti i fundit” ka nisur në Cremona, ndërsa u vazhdua edhe në qytete të ndryshme në Itali. Mes të arrestuarve ka edhe futbollistë të tjerë, por edhe ish lojtarë si Carlo Gervasoni (Piacenza, aktualisht i dënuar), Filippo Carobbio (Spezia), Zamperini dhe Luigi Sartor (ish-lojtar i Parmës, Vicenzas, Interit dhe Romës) dhe Marco Paolini (Benevento, i dënuar).

Sipas policisë, të arrestuarit janë të akuzuar për kurdisje të ndeshjeve, ndërsa kanë kontakte me banda kriminale nga Singapori dhe Evropa Lindore. “Ky nuk është fundi, është vetëm një pikë e nisjes”, tha prokurori nga Cremona, Roberto di Martino i cili theksoi se njëri nga të dyshuarit ka pranuar se kurdisjet e ndeshjeve kanë vazhduar për më tepër se 10 vite.

“Të shpresojmë se është një pikënisje për pastrimin e lojës së bukur që është futbolli”, shtoi ai. Hetimet janë vazhdimësi e atyre të mëhershmëve të këtij viti nga autoritetet e futbollit, që u përcollën me dënime të futbollistëve të ndryshëm, përfshirë Donin i cili është pezulluar nga futbolli për tri vite e gjysmë nga Komisioni Disiplinor i Federatës Italiane të Futbollit.

Atalanta, që u promovua në Serie A në fund të sezonit të kaluar - është dënuar me gjashtë pikë. Doni ka theksuar se është i pafajshëm. Ndeshjet e Atalantas në Serie B po ashtu ishin në mesin e atyre të dyshimtave.

Dyshime për kurdisje edhe në Serie A

Sipas medieve italiane, ekzistojnë dyshime për kurdisje edhe të ndeshjeve nga Serie A dhe kanë të bëjnë me klubet tashmë të rëna nga kategoria; Bari, Brescia e Sampdoria. Ndeshjet nën dyshim thuhet se janë Brescia-Bari (rezultati 2-0, 6 shkurt 2011), Brescia-Lecce (2-2, 27 shkurt 2011) dhe Napoli-Sampdoria (4-0, 30 janar 2011).