Bekam i fut frikën titullarëve

 Sezonin e kaluar u prit me madhështi nga tifozeria kuqezi, por sivjet ai shihet si shpëtimtari, ose më saktë si cilësia që i mungonte Milanit për të synuar fitimin e titullit në kampionat dhe Ligës së Kampioneve. Por nëse Devid Bekam shton optimizmin në radhët e fansave të “djallit”, mbërritja e tij në Milano ka vënë në alarm të gjithë mesfushorët kuqezinj, sepse anglezi, ashtu sikurse në vitin e kaluar ka treguar se është i aftë të mbulojë çdo pozicion në mesin e fushës. Një fakt të tillë e ka konstatuar edhe trajneri Leonardo nga stërvitjet e Devid Bekamit, pavarësisht se nuk e ka stërvitur në sezonin e shkuar. Gjithsesi, tani, Pirlo, Ambrozini, Sedorf, Gatuzo dhe aq më shumë Flamini nuk ndihen më aq të sigurt për të pasur më shumë hapësirë në ekipin e Leonardos. “Spice Boy” është një element shumë cilësor që i shtohet skuadrës së Milanit dhe natyrisht që të gjithë presin shumë prej tij. Por eksperienca e kaluar e Bekamit bën të gjithë të shpresojnë për suksese të mëdha. Sikur të mos mjaftonin vetëm cilësitë e lojtarit, është edhe fati që mbështet mesfushorin anglez, i cili në ndeshjen e tij të parë të 2010-ës do të gjejë përballë Xhenoan (në “San Siro” Bekam me 99 për qind do të luajë që nga minuta e parë), skuadër së cilës i ka shënuar një super-gol me goditje dënimi në sezonin e kaluar, pikërisht në “San Siro” dhe në një distancë pothuajse njëvjeçare, të gjithë tifozët kuqezinj urojnë të shohin një tjetër super-gol të Devid Bekamit, ndërkohë që Leonardo do të kënaqej me një fitore dhe një paraqitje të mirë të futbollistit anglez dhe të të gjithë skuadrës.