Beqja: Makroekonomia e vendit, në rrezik

Nënsekretari për Programin në PS, Ilir Beqja, reagoi sot lidhur me vendimin nga ana e qeverisë për mosripërtëritjen e marrëveshjes me Fondin Monetar Ndërkombëtar. Në një deklaratë për shtyp Beqja tha se “jemi të alarmuar nga rreziku që i kanoset qëndrueshmërisë makroekonomike të vendit në vitin e ardhshëm”. Nënsekretari në PS tha se vendimi i Berishës kishte thjesht qëllime elektorale, pasi se përvoja e vendeve të tjera tregon që ekzistojnë hapësira të mjaftueshme për të vijuar bashkëpunimin me Fondin Monetar Ndërkombëtar, qoftë me një marrëveshje të rregullt, qoftë me një marrëveshje “stand-by”.

“Ne jemi të alarmuar, pasi si buxheti faktik i vitit 2007, ashtu edhe raporti i Kontrollit të Lartë të Shtetit për këtë buxhet konfirmojnë papërgjegjshmërinë e frikshme të qeverisë shqiptare në menaxhimin e financave publike”, u shpreh Beqja, duke përmendur edhe rreziqet me të cilat po përballet vendi, të bëra të ditura edhe nga vetë FMN në një raport të saj.