Berisha-Muiznieks: “Investigimi i plotë i 21 janarit, thelbësor për vendin”

Kryeministri Sali Berisha shprehu dje gjatë takimit me Komisionerin për të Drejtat e Njeriut në Këshillin e Evropës, Nils Muiznieks, vlerësimet për misionin e rëndësishëm të tij dhe kontributin që Këshilli i Evropës dhe zyra e tij kanë dhënë në drejtim të konsolidimit të të drejtave të njeriut në hapësirat evropiane. Muiznieks i shprehu Kryeministrit Berisha vlerësimet më të larta për punën e suksesshme që kryesia shqiptare e radhës e Komitetit të Ministrave të Këshillit të Evropës ka bërë dhe po vijon të bëjë gjatë kësaj periudhe të drejtimit nga ana e Shqipërisë. Komisioneri i KiE vlerësoi miratimin me konsensus të amendimeve të kuadrit ligjor të Kodit Zgjedhor, në përputhje me rekomandimet e ODIHR dhe organizmave të tjerë ndërkombëtare, si Komisioni i Venecias, duke e vlerësuar atë si një garanci të rëndësishme për mbarëvajtjen e zgjedhjeve në Shqipëri. Në takim u diskutua gjithashtu edhe mbi hetimin e ngjarjeve të 21 janarit. Kryeministri Berisha i theksoi Komisionerit të KiE se “investigimi i plotë, gjithëpërfshirës i ngjarjeve, motiveve dhe përgjegjësve të kësaj ngjarjeje, është dhe mbetet thelbësore për vendin dhe se, qeveria shqiptare mbetet e vendosur për një hetim të thellë, të plotë, të paanshëm dhe gjithëpërfshirës të kësaj ngjarjeje, si kusht themelor për sjelljen e shkaktarëve përpara drejtësisë, çka do t’i bëjë një shërbim të madh konsolidimit të mëtejshëm të shtetit ligjor në vend”.
Për sa i përket çështjes së heqjes së imunitetit, Kryeministri Berisha i rikonfirmoi Komisionerit të KiE vullnetin e plotë të qeverisë shqiptare që kjo nismë të realizohet, duke u dhënë mundësinë qytetarëve, nëse do të jetë e nevojshme, të shprehin vullnetin e tyre përmes referendumit popullor, si një hap cilësor në luftën kundër korrupsionit, konsolidimin e shtetit të së drejtës, konsolidimin e barazisë së të gjithë qytetarëve përpara ligjit. Komisioneri për të Drejtat e Njeriut në KiE, Nils Muiznieks, e falënderoi Kryeministrin Berisha dhe i shprehu vlerësimet e tij edhe për kontributin e qeverisë shqiptare për sa i përket konsolidimit të pavarësisë së institucionit të Avokatit të Popullit dhe Komisionerit kundër Diskriminimit në Shqipëri. Duke u ndalur në zhvillimet në rajon, Komisioneri KiE, Nils Muiznieks, i shprehu Kryeministrit Berisha vlerësimet dhe mirënjohjen e tij dhe të Zyrës që ai drejton, për qëndrimin konstruktiv e të moderuar dhe për kontributin e Shqipërisë në shërbim të paqes dhe promovimit të bashkëpunimit e miqësisë në rajon. Kryeministri Berisha e siguroi atë se Shqipëria do të vijojë kontributin e saj në shërbim të paqes dhe në konsolidimin e miqësisë, bashkëpunimit dhe marrëdhënieve të mira në rajon. Por, ai shfrytëzoi rastin për t’i theksuar Nils Muiznieks se fenomeni i albanofobisë vijon të përbëjë një shqetësim serioz, që fatkeqësisht edhe sot shfaqet herë pas here në vendet e rajonit tonë. Këto qëndrime, të bazuara mbi doktrina diskriminimi racist ndaj shqiptarëve, janë dhe do të mbeten përherë të pa pranueshme nga shqiptarët, në cilëndo formë që ato të shfaqen.