Berisha: Prisni tenderin e miellit, aty bëhet deti kos

Kryeministri Berisha reagoi në rrjetin social Facebook për nismën e kryeministrit të ardhshëm, Edi Rama për aplikimet on-line për vendet e punës. Në shkrimin e tij, kryeministri Berisha thotë se do të ketë të tjera nisma të tilla të ndërmarra nga Rama në vijim. Oreksi vjen duke ngrëne! Të dashur miq, në selinë mavi revansh i paparë. Pas hapjes së tenderit online për fshesën ndaj administratës, z.Rama njofton se konkurset për vendet e punës në administratë nuk kanë qene të hapura (paçka se botoheshin në të gjitha mediat e kontrolluara prej tij), prandaj për t’i hapur ato ai ka vendosur që çdo njeri për të marrë pjesë në konkurse për punësim në administratë duhet më parë të aplikojë online dhe të presë biletën në selinë e PS. Por siç thotë fjala e urtë oreksi vjen duke ngrëne z. Rama njoftoi se fshesa e partisë do të fshijë (pastrojë) edhe sektorin privat, i cili së shpejti do të “ndihmohet” me aplikantët e “virtytshëm” online të selisë së PS. Kjo është lule. Prisni prisni tenderin e miellit. Aty deti bëhet jo kos por flori. Tepron edhe për ndonjë mik të çmuar që çmendet pas gjahut dhe trafiqeve! Ndryshim!! Me vrap drejt të shkuarës!, shkruan kryeministri Berisha.