Berisha takon Kryetarin e BDI-së Ali Ahmeti
Kreu i BDI-së nënvizoi se këtë pranverë do të fillojë ndërtimi i vazhdimit të rrugës së Arbrit, në territorin e Maqedonisë, si dhe është shpallur tenderi për ndërtimin e hekurudhës që lidh kufirin shqiptar me qytetin e Shkupit
Kryeministri Berisha prit sot në një takim Kryetarin e Partisë Bashkimi Demokratik për Integrim (BDI) të Maqedonisë Ali Ahmeti, me të cilin diskutoi zhvillimet në Shqipëri dhe Maqedoni, si dhe zgjerimin e mëtejshëm të bashkëpunimit midis dy vendeve.
Duke i uruar mirëseardhjen dhe duke shprehur kënaqësi për këtë takim, Kryeministri Berisha përshëndeti kontributin që z.Ahmeti dhe BDI-ja kanë dhënë dhe po japin në qeverisjen e Maqedonisë. Ndër të tjera, ata u shprehën për forcimin e bashkëpunimit midis dy vendeve.
Zoti Ahmeti e informoi Kryeministrin Berisha dhe lidhur me disa investime mjaft të rëndësishme në fushën infrastrukturore në Maqedonisë, të cilat do të ndikojnë në lehtësimin dhe përmirësimin e lëvizjes në rajon.
Kreu i BDI-së u shpreh se ketë pranverë do të fillojë ndërtimi i vazhdimit të rrugës së Arbrit, në territorin e Maqedonisë, si dhe është shpallur tenderi për ndërtimin e hekurudhës që lidh kufirin shqiptar me qytetin e Shkupit.
Kryeministri Berisha shprehu kënaqësinë e tij për këtë lajm dhe theksoi se ndërtimi i këtyre rrjeteve lidhëse janë prioritet i tij dhe i qeverisë shqiptare.
Kryeministri Berisha i shprehu gjithashtu z. Ahmeti falënderimet për organizimin e shkëlqyer të 100 vjetorit të Kongresit të Manastirit, që për shqiptarët shënon një ndër ditët më të ndritura të historisë kombëtare. Edhe z. Ahmeti, nga ana e tij, falënderoi Kryeministrin Berisha për ndihmën dhe angazhimin e tij dhe të qeverisë shqiptare për mbajtjen e aktiviteteve në kuadër të këtij jubileu.
Duke u ndalur edhe në zgjedhjet e ardhshme parlamentare në Shqipëri dhe ato presidenciale dhe lokale në Maqedoni, Kryeministri Berisha dhe kryetari i BDI-së Ahmeti theksuan angazhimin e tyre për të bërë të gjitha përpjekjet për realizimin një procesi zgjedhor të lirë dhe të ndershëm.
...