Berluskoni në lot e sulm: Gjykatat të politizuara. Qeveria të ecë përpara

Itali- “Qeveria Letta duhet të shkojë përpara”,- ka thënë udhëheqësi i PDL-së, Silvio Berluskoni, i cili foli përpara deputetëve dhe mbështetësve në Pallatin Grazioli mbrëmë.

Dhe në një fjalim nga përmbajtja e moderuar përveç një sulmi mbi gjyqësorin ka lëshuar një paralajmërim të qartë:. “Unë jam i pafajshëm. Jam këtu, do të qëndroj këtu dhe nuk heq dorë”,- tha ish-kryeministri italian.

Ndërsa ka hedhur akuza kundër gjykatësve që sipas tij janë të politizuar, duke ju referuar dënimit të disa ditëve më parë ndaj tij, vendim të cilin e quajti të padrejtë.

Në këto vite që më kanë mbetur do të vazhdoj të luftoj për demokracinë dhe lirinë,- tha Silvio Berlusconi, duke garantuar vazhdimësinë e qeverisë. I vetëm në podium, Berlusconi u përlot kur dëgjoi himnin kombëtar, por edhe nga mbështetja që shihte nga të pranishmit.

Ndërsa mes duartrokitjeve përsëriti: Hetuesia është e përbërë nga nëpunës shtetërorë të papërgjegjshëm që janë munduar të më nxjerrin jashtë politikës për 20 vjet me radhë, e tani ia arritën qëllimit të tyre.

Sipas organizatorëve të pranishëm ishin rreth 25 mijë persona. Pas dënimit nga Gjykata e Kasacionit me katër vjet heqje lirie, por që ai mund të vuajë vetëm një në arrest shtëpie, ish-kryeministri po mundohet të mbajë një ekuilibër në gjirin e partisë së tij mes atyre që duan një largim nga qeveria me bazë të gjerë dhe të tjerëve që kanë një qëndrim më të butë.