Besa, kampionia kërkon ta bëjë ‘bis’

Kavajasit do tëp resin Tiranën në ndeshjen tjetër gjysmëfinale që vlen një vend për në finalen e madhe të Kupës së Shqipërisë. Kampionia në fuqi, Besa, ka detyrën e vështirë që të përmbysë rezultatin e takimit të parë me 24 herë kampionët e vendit, të cilët fituan me rezultatin minimal 1-0 në kryeqytet. Për ta bërë sa më të ethshme atmosferën, presidenti Nexhat Bizhdili ka vendosur që të hapë dyert e stadiumit për të gjithë tifozët kavajas dhe nuk ka ngurruar të akuzojë drejtuesit e Tiranës se kanë hapur fjalë se do të tolerojnë ndaj Bylisit në fundjavë, duke i bërë kështu presion skuadrës së tij që të “hapë krahun” në Kupë. “Jam i informuar se Tirana po bën lojë me dy porta, duke toleruar ndeshjen kundër Bylisit, duke punuar kështu kundër nesh. I paralajmëroi tiranasit se i pret humbja në Kupë. Nëse Besa zbret një kategori më poshtë, atëherë ajo është armikja jonë më e madhe”.

Në kampin tjetër, kapiteni Andi Lila, një ish i Besës, dëshiron kualifikim dhe të gjejë në finalen e Kupës Dinamon. “Na mban në lojë rezultati i ndeshjes së parë. Gjithsesi, do të mobilizohemi maksimalisht. Do të luajmë me theks sulmues. Do ta kërkojmë vazhdimisht golin. Finalja? Do të doja të luaja kundër Dinamos”.