Besimtarët myslimanë festojnë sot Kurban Bajramin, falje nëpër xhamitë e Tiranës
Tiranë, 27 nëntor, NOA Besimtarët myslimanë festojnë sot festën e Kurban Bajramit dhe në Tiranë ata janë duke kryer ritin e faljes para xhamisë kryesore të qytetit, atë të Ethem Beut.
Ndërkaq, edhe në xhaminë e Prishtinës, besimtarët myslimanë falën këtë mëngjes Namazin e Kurban Bajramit.
Muftiu i Kosovës, Naim Tërnava, në mesazhin e tij ka thënë se kjo ditë përforcon ndjenjën e humanitetit, të solidaritetit dhe të bamirësisë.
Festa e Kurban Bajramit ka si qëllim të saj frymëzimin e dashurisë, të triumfit të së mirës ndaj së keqes, vetëpastrimin e shpirtit dhe mbetet një simbol i sakrificës.
Sipas përfaqësuesve të këtij besimi fetar, prerja e kurbaneve është një prej treguesve të afrimit tek e vërteta.
Kurban Bajrami është një ndër dy festat e besimtarëve myslimanë krahas Fitër Bajramit. Në këtë ditë bëhet kurban për hir të Zotit dhe mishi u dhurohet të varfërve.
Në thelb, kjo festë është përkujtim dhe ripërtëritje e aktit të Profetit Ibrahim, të konsideruar baba i profetëve, i cili u tregua i gatshëm të sakrifikonte djalin e tij, Ismail, nga një urdhër i Zotit përcjellë në ëndërr.
Po kështu, Kurbani ka edhe vlerën e falënderimit të Zotit për furnizim nga dhuntitë e Tij.
n.e/NOA